محمد عمر يكتب: أنتو حبايب

كُنت لسه عندَها...
طبعا زعلانة مِنّك
فعلاً أنت جرحتها
مش هقول كان غصب عنّك

يعنى إيه تغضب وتغلط
بالكلام اللى أنتَ قُلته؟
كنت يعنى أنتَ هتسكت
لو كلام زيهُ سِمِعته؟

أنت شايف إن غضبك
يبقى عذر لأى غلطة؟
حتى لو يجرح حبايبك
أو هيتسبِّب فى ورطة ؟

اللى بردو عرفته منها
إن دى مش مرة أولى
مسألة... إنك تهينها
شىء بقى ف غاية السهولة

أيوا بتقول الأصول
إنها تصبر فى غضبك
بس مين اللى يقول
كل يوم تقبل إهانتك ؟

بس تعرف ... دايبة فيك
رغم كل زعلها مِنَّك
عايزة تطمِّن عليك
عامل إيه وأنتَ لِوحدك

وِأنتَ اهوه... باين عليك
مش سعيد بردو بزعلها
وأحزان الفراق فى عنيك
حتى لو مكسوف تقولها

دى الحقيقة... أنتو حبايب
حتى وِأنتو زعلانين
ليه حبيب عن حُبه غايب؟
ليه فى قلب يبات حزين؟

لازم أنتَ اللى تصالحها
لو هتتحايل عليها
أنت بردو أكيد جارحها
مش حرام لمّا تراضيها.