رفعت يونان عزيز يكتب: زيادة أسعار السماد موت للفلاح

جميلة وحلوة يا بلدى، نيلك طرح الخير، بأيدى أنا الفلاح زرعت أرضك تحت شمسك، وفى برد شتائك صبيت عرقى من أجل خروج محصولك قمح وذرة وخضار وفاكهة وباقى البقول وغيرها وراضى على اللى ربى مقسمه ليا بس الحكومة يظهر بالها مشغول مع رجال الأعمال وشركات السماد الضاغطة عليها لرفع سعر الطن من الأسمدة لكل نوع 33% أما الفلاح لأنه فى الطين نازل وملابسه الطمى كاسيها، الحكومة غفلت عنه وسعر إردب القمح والذرة ثابت.

يا ناس يا حكومة حسى وراعى الفلاح دا شقيان وزيادة سعر طن السماد موت وخراب ديار والفلاح راح يهرب ويترك الأرض ويدور على سفرية وتبور الأرض الطيبة ونرجع نقول فين الإنتاج والعجز فى ميزان المدفوعات ولا يكون فيه صوامع ولا مطاحن والناس تصرخ وندخل فى مجاعة تؤدى لثورة تسمى بثورة الجياع، بلدى يا حلوة قولى كلمة حق عن الفلاح وحل مشكلة السماد ومستلزمات الزراعة حلا جذريا، الفلاح يكسب وكمان شركات ومصانع الأسمدة ومستلزمات الفلاح تكسب.