أحمد عبد الغنى يكتب: ألبوم الوفيات

يوسف صاحبى مات..
بلوح إزاز وقع عليه
وابن عم عبده مات
برضو هاقولك ليه
باب حديد انخلع من حواليه
طار ووقع على إيده ورجليه
مات وماتت الضحكة جوه عينيه
وأمه لسه باكية بتناديه
وقالولى صحبى التانى مات
برضو من غير دوشة وفى سكات
مات فى المدرسة بتاعة اللغات
لما النافورة الرخام
اتكسرت حتت وفتات
نزلت على دماغه اتكسرت فى ساعات
وكسرت قلب أمه والإخوة والأخوات
ولسه هنقفل الكراسات
قالوا أتوبيس مدرسة البنات
كل اللى فيه خلاص أموات
وفى البحيرة جثث متفحمات
ماتوا الطلبة والطالبات
وعملنا صوان الحزن فى كل المسافات
محافظة والتانية وقرى ونجوع
والمسئول يقول.. هندفع تعويضات
رخصوا البش والتمن بقى ألوفات
حزين عليك يامصر
يانموت برصاص.. يا نموت م الجوع
يانموت فى الطرقات