فوزى الرشيدى يكتب: رسالة من شهيد

أنا الشهيد
أهلى قالوا غاب مات لكنى حىّ
لقيوا عضمى فى أرضها
بحرس فوق الأرض وبطنها
تمللى صاين عرضها
إن كنت ميت إن كنت حى

أنا الشهيد
لقيوا معايا زمزميه
كنت بملاها ميه
من اللى ظهرت فى القناة
من اللى شفتوها ديا
لقيوا معايا فردة بيادة
كنت قالعها كالعادة
لما بدخل بطن بلدى
لقيوا معايا محفظتى
فيها كارنيهى وبطاقتى
مكتوب فيها إنى مصرى
إنى من خير الأجناد
اللى حافظت على البلاد

أنا الشهيد
لما حفروا القناة
لما خبطوا على أرضها
طلعت أنا واقف أوام
أديت التحية والتمام
أفندم أنا الشهيد

أنا الشهيد
عايش تحت ترابها
شايلها على راسى
ماهو ترابها دا ما ينداس
ترابها دا ينضم يتروى بالدم
تعشقه تحفظه صم
تطرد من عليه كل وسواس خناس

أنـا الشهيد
جاى من بعيد
أحكيلك عن جندى بلادك
رفض يكون زى العبيد
عاش حر مات حر
كان بيروى الأرض بدم
ونقولها هل من مزيد

أنا الشهيد
اندفنت فى ترابك يامصر
عشت تحت أرضك كأنه قصر
أنا الشهيد إبن مصر