خلود الطيب تكتب: بحلم

بحلم بباب أفتحه
فى صبحية فجر
أفتحه للنور
يدخل منه الدفا
وزقزقة الطيور
بحلم بيتيم أحضنه
ويعيش وسط الزحام
أمن ومستور
بحلم بكلام
أكتبه وأردده
واعيشله العمر أقول
بحلم بإنسان
بفارس
راجل من ولكل العصور
بحلم ببيت
دافئ صغير
لكنه أحلى من القصور
بحلم بصمت
لكل منحل وتافة ومتهور
بحلم بدنيا
للبشر تتبلور فيها كل الأمور
بحلم بغلط
مش بالصدفة كان
وعن إصلاحه حد مسئول
بحلم برأى
أقوله
من غير ميه تنبيه ومحظور
بحلم بأمل
عايش فارح
مش على الأبواب والحارات منحور
بحلم برضيع
يتولد معه بكره
ومايعيش مقتول
بحلم بساعد
للعلم رافع
بجبروت وقوة المفتول
بحلم بمثل أعلى
للعمر.. على الكتاف محمول
بحلم بغلبان
ع الحلم قادر مش ع المر مجبور
بحلم بغنى
للنعمة فاهم
مش عايش بيها مكدور
بحلم بدين
سنة وإيه وعهد
بين فاعل ومعفول
بحلم ببراءة
مبدأ واضح بيه معمول
بحلم بقصة
للحب عايشة
ومخلصه فيها السطور
بحلم ببستان
فيه البشر ندية
زى الزهور
بحلم بألم
أودعه
واعبر بعده للأمان عبور
بحلم بسكه
امشيها
الندم فيها مالوش عنوان
ومش مأمول
بحلم بثنا
يتنثر بروحى
ويكون عملى عند ربى مقبول
بحلم بست
تربى ابن عازم للقدس منصور
بحلم بزعيم
يلم تحت جناحه الكل
واعى وصبور
بحلم بسيف
بالعدل ناطق ظاهر مسلول
بحلم بغصة
تنقلع من القلب
وتترفع الراس المحنى والمكسور
بحلم بشمس
تسطع ويكون ظهورها أجرا ظهور
بحلم بقمر
يلم العاشقين
ويعلمهم يعدوا السور
بحلم بزمن
الحب فيه ملك
مش مسكين مبطور الإيد مشلول
بحلم بحب
فوق حدود الواقع والمعقول
بحلم بحبيب يكون لى
بحمى يصون فارس جسور
بحلم ببكرة
وهاعيش احلم بيه
ولو العمر عدى
ومهما يطول
بحلم بهوية
ما بين جنيه وحورية
وعروسة البحور
بحلم بحلم
خيالى رومانسى
لكنه حقى وشرعى
لا مسروق ولا منقول
بحلم وحقى احلم
ولا عمرى هاسمح
يعيش جوايا مقهور