ويقول كرم " أنا شغال بياع فول على عربية بقف بيها فى الشارع عشان لقمة عيشى، عايش مع أبويا اللى عمره معدى السبعين سنة، وأمى، اللى عندها ستين سنة، واختى الصغيرة وأخويا الكبير رمضان"
وأضاف "رمضان دا كان عامل مشاكل كتير، مع الناس اللى بره ومع أبوه وأمه وأخواته، كان كل يوم بيضربهم بالرغم من سنهم الكبير وعجزهم ومرضهم، هو شغال جزار فى مدبح المنيب، واللى بيكسبه من الشغل بيصرفه على البرشام والمخدرات، والناس كلها عارفه أنه بتاع مشاكل، سمتعه سبقاه فى أى مكان، لدرجة إن أكتر من عريس اتقدم لاختى الصغيرة، لكن كان بيسبها عشان رمضان ومشاكله".
وتابع " قبل اليوم اللى شهد الحادثة، اتخانقت معاه عشان كان بيشتم أبويا وأمى بدون سبب، لأنه دايما كان بيعمل كدا معاهم عشان ياخد فلوس يشترى بيها مخدرات، ولما اتخانقت معاه ضربنى وبعدين خرج من البيت عشان يسهر زى كل يوم، وحوالى الساعة 4 الفجر سمعت صوت خبط على الباب، ولما فتحت لاقيت أخويا رمضان مرمى وفيه سكينة مغروسة فى رقبته، فسحبت السكينة بسرعة وكتمت الدم بفانلة لكن بعد لحظات مات".
واستطرد المتهم فى حديثه قائلاً "الجيران اتلموا على صوت صراخ أمى، وطلبوا الإسعاف، ساعتها أنا خفت، لما لاقيت الجيران بيقولولى قتلت أخوك ليه، قلت لهم أنا مقتلتوش، ولاقيت نفسى من غير ما حس، جريت واستخبيت فى جنينة، وبعدين سلمت نفسى".
ونفى كرم الاتهام الموجه إليه بقتل شقيقه قائلاً "إسألوا أبويا وأمى، كانوا شاهدين لما فتحت الباب ولاقيت رمضان مضروب بالسكينة، أنا اتخانقت معاه كتير، لكن عمرى ما مسكت سلاح قصاده، وخلافى معاه كان دفاعاً عن أبويا وأمى، كان نفسى يكون كويس ويساعدنى فى جواز أختنا الصغيرة، وبعدين إيه اللى يخلينى ارتكب جريمة قتل وأضيع مستقبلى، وأنا كنت بأجهز شقتى عشان أتجوز، وإن شاء الله ربنا هيظهر الحق وأطلع براءة".
ورغم نفى المتهم ارتكابه الجريمة، إلا أن تحريات رجال المباحث كشفت عن تورطه فى قتل شقيقه، حيث تبين للمقدم رامى نور رئيس مباحث مركز شرطة أبو النمرس ومعاونه الرائد أحمد لاشين، أن القتيل كان دائم الشجار مع والديه بسبب تعاطيه المواد المخدرة، ويوم الحادث عاد إلى منزله فجراً فنشبت بينه وبين شقيقه المتهم مشادة كلامية، تطورت إلى مشاجرة وعندما أشهر القتيل سكين انتزاعها من يده المتهم وغرسها فى رقبته وفر هارباً".
وتمكن رجال المباحث من القبض عليه، وحرر العقيد رجب غراب مفتش مباحث قطاع جنوب الجيزه المحضر اللازم ، وأحاله إلى النيابة فأمرت بحبسه احتياطيا على ذمة التحقيق.
موضوعات متعلقة ..
شقيقان يقتلان شقيقتهما بسبب سمعتها السيئة فى القليوبية
تم أضافة تعليقك سوف يظهر بعد المراجعة