بعد التحية
أنا عارف إنك شىء لذيذ
بتمنى أشوفك من بعيد
لو حتى موجود ع الرصيف
قدام بتاع حب العزيز
مايهمنيش
لو مرمى وسط عقول خلا
تشبه كتير فصل الخريف
أنا عارف إنك فيك بلا
وإن أنت مغصوب ع الوجود
تايه م بين مليون كفيف
وإن انت جواك الحلول
لكنها فين هى العقول
والاعتراض كان ليها سيف
وبفكرك
خليك قوى كمل طريقك
هتكون ف يوم قائد فريقك
والغيبة دى هتكون بريقك
وعيون كتير هتبل ريقك
ديوانى العزيز
وهييجى يوم
وتكون أكيد نجم النجوم
فى ناس كتيرة هتدمنك
على وزنتك على قافيتك
على حكمة منك راح تقوم
وهيحزنوا
على كام قصيدة بحبهم
على كام قصيدة محبونيش
على دمعة كانت منهم
على ضحكة يوم بقيت مفيش
على حد كان جواك مقيم
قرر ف لحظه مايشتريش
بغيابه حرر دمعتك
على حد شاركك سكتك
ساعة البكا قام سكتك
كان الندى اللى ف دنيتك
أصبح يادوب دخان حشيش
طاير بعيد بتحنله لكن مفيش
ديوانى العزيز
بحزن عليك من نيل بيرمى
همومه فيك
ولناس بتقتل حلمنا
بين السطور بيبوحوا ليك
ولناس كتير
عايشين مابين حبة ورق
ف رصيد وشيك
ولناس بتحلم بالرغيف
على ناس جيناتهم من وطن
لو مهما يجرى ماتشتكيش
ولناس طموحهم سقف كوبري
وهما نايمين ع الرصيف
على ناس بترمى
حته حته ف لحمها
علشان تعيش
ديوانى العزيز
مين اللى متحملنى غيرك
والله كتر الف خيرك
صدقنى هتلعلع مسيرك
هتبوح بنشوه بكلمتك
بس أوعى تيأس
كمل يا صاحبى ف سكتك
تم أضافة تعليقك سوف يظهر بعد المراجعة