كشفت الممثلة الشابة جهاد حسام الدين في تصريحات خاصة لـ"اليوم السابع" عن شخصيتها "حنين" التي لعبتها ضمن أحداث مسلسل مسار إجبارى الذى عرض ضمن دراما رمضان 2024، في النصف الأول من الشهر.
وصرحت قائلة: "رشحنى للدور الأستاذ مودى شاهين casting director المسلسل، وأنا أعرفه من مسلسل ليه لاء، وهو نفسه الذى رشحنى لـ دورى في مسلسل بين السطور".
وتابعت جهاد قائلة: "شخصية حنين كانت الصعوبة فيها أنها شخص عادى ممكن تقابله في الشارع فى الشغل فى المدرسة فى أى مكان ممكن يبقي فيه تعامل عادى، بس فى نفس الوقت عندها دوافعها اللى بتخليها عايزة تنجح، لدرجة أنها مش بتشوف حد، حتى الولد اللى بتحبه، هى بتحب نفسها أكتر من كل اللى حواليها، مش عارفة تشوف حاجة بره طموحها، حنين كانت بتحاول تنجح دايمًا، بس هى بليدة".
وأكدت جهاد قائلة: "صعب أوى أنى أبقى زى شخصية حنين من مسار إجبارى، هي بعيدة أوى عنى، بس فيها منى أنى بحب أذاكر وأنجح، ومش بسيب حاجة للصدف، وفعلاً حنين كانت صعبانة عليا طول ما أنا بقدم الشخصية".
وأشارت جهاد قائلة: شخصية حنين كان صعبة كلها، مكنش فيه مشهد واحد محدد ممكن أقول أنه الأصعب، خاصة أنها بتتهزأ كتير أوى، من مجدى حشيش اللى بيقدمه النجم رشدى الشامى، وعلى اللى بيقدمه عصام عمر، وفى كذا موقف، ومع كل تهزيئه تغير من طريقتها، على قد ما هو ممتع على قد ما كنت بفكر أنها بتتهزأ كتير أوى، وكنت أوقات ببقى حاسة أنى بتهزأ أوى، بس هى عندها ليفيل بلادة كبير، وفى أشخاص كتير بتنجح كده".
وأنهت جهاد حديثها لـ"اليوم السابع" قائلة: "تعلمت من حنين أنى لو فشلت فى حاجة أذاكرها، واتعلمها".
مسلسل مسار إجبارى مكون من 15 حلقة ويعرض ضمن مسلسلات رمضان 2024، بطولة أحمد داش، عصام عمر، صابرين، بسمة، جورى بكر، نور محمود، مى الغيطى، رشدى الشامى، ياسمينا العبد، معاذ نبيل، محسن منصور، جهاد حسام، نورين أبو سعدة، إبراهيم الزيادى، وعدد آخر من الفنانين، هو سيناريو وحوار أمين جمال، محمد محرز، مينا بباوى وإخراج نادين خان وإنتاج المتحدة للخدمات الإعلامية.
.JPG "جهاد حسام الدين")
جهاد حسام الدين
شاهد المزيد من أخبار مسلسلات رمضان 2024 عبر بوابة دراما رمضان
