تجولت عدسة اليوم السابع في منطقة السيدة عائشة بالقاهرة، وأجرت حوارا مسجل بالفيديو مع "عم محمد" الشهير بـ "محمد عصفورة"، بائع العصافير المحمرة، الأكلة الأكثر تداولا في الميادين الشعبية والتي تعتبر تسالى البسطاء حيث يصل سعر الواحدة منها ما بين 50 قرشا وحتى 2 جنيه.
وتقدم العصافير في قرطاس من الورق بعد تنظيفها وسلقها وذبحها على الطريقة الشرعية ويتم تحميرها مضافا إليها قليلا من الملح والتوابل وتؤكل على مرة واحدة بعظمها، أكله تجد الكثير من هواتها، فإذا وجدت أحد محبيها تجده يأكل حتى 30 عصفورة مرة واحدة وينتشر بائعوها في يوم الجمعة بالميادين.
ويقول عم محمد، "انا ببيع العصفورة بـ 50 قرش بس، والعصافير أكله ليها ناسها وتسالى في نفس الوقت، وديه مهنتى أبا عن جد، واحنا أساسا بنجيبها من مصائد الشباك وبنشتريها من اللى بيصطادها ، وبنقوم عاملين حلة مياه ساخنة علشان نسلخ العصفورة من الريش بتاعها وبنغسلها كويس جدا وبعد كده بنسلقها لمدة معينة ".
وتابع، "بعد سلق العصفورة بنشيل الجزء الصغير من الرجل وبنسيبها كاملة براسها، بعد كده بنجيب اللية ونحطها في الطاسة علشان تسيح لان اللية بتدى طعم وريحة حلوة جدا في الاكل وبنحمر العصفورة ونحطلها التوابل معاها لما بنقدمها للزبون".
وأردف: "أصعب طريقة فى إعداد العصافير هو تنضيفها من الريش وإخراج احشائها وفى ناس بتاكلها مسلوقة وفى ناس برضه بتاكلها محمرة ده كييف وطعمها جميل جدا، و بتتاكل على بعضها بعظامها لأن عظمها طرى وبيتندغ في الفم سهل".
