مَعرفش ليه الذاكرة
بتشيل دموع وأنين
مَتْشِيليش فرح وحبّْ؟
معرفش ليه الذاكرة
محفور ف لوحها الغُلبْ
ماسكة المشاهد
لمّا بتكون مُحزنة
بإْيدين حديد
ماسكة المشاهد
لما بتكون مفرحة
بإْيدين جليد
وكإنها
قناصة وانت طريد
الذاكرة
العشوائيهْ..
ف اقتناص الوقت والمنظر
تفرح
تجيبلك م الدفاتر كل ما يْكَدَّر
تزعل
تهزر
وف لحظة هادية بْتِنْتِشي بالإنسجام
ممكن تجيبلك م الرُّكام
ممكن تجيبلك م القديم
وبموج غشيم
ممكن تعوَّر
الذاكرة
مهمن تِسَيِّج أو تِسَوَّر لحظتك
تقدر تعكنن حضرتك
تقدر تصوَّر ضحكتك وقت الدموع
تقدر تصوَّر دمعتك وقت البراح
معرفش هل مُتَخَصِّصَة
بس فْ جراح؟
مش مُفترض تِعْدِل ما بين نقيضين؟
ولا انت يمكن زي كل الناس حزين؟
فتجيب منين؟
يظهر كدة
الذاكرة
سجن وْسَجين.
